काठमाडौं । रसुवामा आएको बाढीपहिरोपछि खोज, उद्धार तथा राहत कार्यलाई तीव्रता दिइएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणले सार्वजनिक गरेको २०८३ भदौ २५ गते बिहान ११ बजेसम्मको विवरणअनुसार प्रभावित क्षेत्रमा खोज तथा उद्धारसँगै स्वास्थ्य उपचार, राहत सामग्री वितरण र मनोसामाजिक परामर्शलाई निरन्तरता दिइएको छ।

प्राधिकरणका अनुसार विपद्का कारण कुल १ हजार ३७७ जनाको मृत्यु भएको विवरण सार्वजनिक गरिएको छ। यस्तै, ५ हजार ९३० जना बेपत्ता रहेको उल्लेख छ।

३३३ जनाको उपचार, २१६ जना डिस्चार्ज

विपद्बाट प्रभावितमध्ये विभिन्न ११ वटा अस्पतालमा ३३३ जनाको उपचार गरिएको छ। उपचारपछि २१६ जना डिस्चार्ज भइसकेका छन्।

नेपाली सेनाबाट स्वास्थ्य उपचार पाएका प्रभावितको संख्या ३ हजार ४९९ रहेको छ भने सशस्त्र प्रहरीबाट स्वास्थ्य उपचार प्राप्त गर्नेको संख्या ३ हजार ६०४ पुगेको छ।

प्रभावित क्षेत्रमा १ हजार ३३६ हवाई उडान

प्रभावित क्षेत्रमा नेपाली सेनाबाट १ हजार ३३६ वटा हवाई उडान गरिएको विवरणमा उल्लेख छ। सशस्त्र प्रहरी बल, नेपालबाट प्रभावित क्षेत्रमा २७२ वटा उडान सञ्चालन गरिएको छ।

२१ हजारभन्दा बढी सुरक्षाकर्मी परिचालन

खोज, उद्धार तथा राहत कार्यका लागि नेपाली सेना, नेपाल प्रहरी र सशस्त्र प्रहरी बलका गरी २१ हजार ६३ जना सुरक्षाकर्मी परिचालन गरिएको छ।

१३ करोड ५० लाख रुपैयाँ नगद राहत

नेपाल सरकारले प्रभावित क्षेत्रमा नगद राहतसमेत उपलब्ध गराएको छ। रसुवामा १ करोड रुपैयाँ, नुवाकोटमा १ करोड रुपैयाँ र धादिङमा ५० लाख रुपैयाँ नगद राहत उपलब्ध गराइएको छ।

त्यस्तै, प्रभावित १५ पालिकाका लागि कुल १३ करोड ५० लाख रुपैयाँ नगद राहत उपलब्ध गराइएको प्राधिकरणको विवरणमा उल्लेख छ।

३७ वटा होल्डिङ सेन्टर सञ्चालनमा

प्रभावित नागरिकको व्यवस्थापनका लागि विभिन्न स्थानमा ३७ वटा होल्डिङ सेन्टर सञ्चालनमा रहेका छन्। तीमध्ये नुवाकोटमा २ हजार ६८१, रसुवामा ७७९ र धादिङमा २२५ जना हाल होल्डिङ सेन्टरमा रहेको विवरण सार्वजनिक गरिएको छ।

राहत सामग्री वितरणलाई निरन्तरता

प्रभावित जिल्लामा सडक तथा हवाईमार्गबाट खाद्यान्नलगायत राहत सामग्री पठाउने कार्य निरन्तर भइरहेको छ। राहत सामग्री व्यवस्थापनमा सरकारी, गैरसरकारी, निजी क्षेत्र, विकास साझेदार तथा नागरिक समाजबाट निरन्तर सहयोग भइरहेको प्राधिकरणले जनाएको छ।

इन्धनको मौज्दात

प्राधिकरणका अनुसार प्रभावित क्षेत्रमा हाल ४८ हजार लिटर डिजेल, २२ हजार लिटर पेट्रोल र ९ हजार लिटर हवाई इन्धन मौज्दात रहेको छ। साथै, ४७७ वटा ग्यास सिलिन्डर अनुदानमा पठाइएको उल्लेख छ।

१५० भन्दा बढीलाई मनोसामाजिक परामर्श

विपद्बाट प्रभावित नागरिकको मानसिक स्वास्थ्यलाई ध्यान दिँदै स्वास्थ्य मन्त्रालयमार्फत १५० जनाभन्दा बढीलाई मनोसामाजिक परामर्श प्रदान गरिएको छ।

प्राधिकरणले प्रभावित क्षेत्रमा खोज तथा उद्धार, राहत वितरण, स्वास्थ्य उपचार र पुनःस्थापनासम्बन्धी कार्यलाई समन्वय गर्दै अघि बढाइरहेको जनाएको छ।